12 12 2000 L1 Radio, Station Zuid, de Taallien door Paul Prikken

Holles Limburgs

Wim Kupers en ich, veer zote lèts op het gouvernement hie in Mesjtreech mit professor Van Hout van de universiteit van Nijmegen te kalle.

De kónversasie die góng euver de Raod veur het Limburgs en de sjtreektaalfunksionaris. Dao zoot nog einen angere professor bie: professor Draye oet Leuven.

Limburg is nog ummer ein kattelieke provincie, dus es dao örges get euver het Limburgs geadviseerd moot waere, den vreug de provincie det neet aan de Limburgers zelf, mer aan de kattelieke universiteite van Leuven en Nijmegen. Eigenlik zouwe ze het nog lever aan de Paus zelf vraoge, mer dae kalt Latien, Pools en Italiaans en es dae zich ouch nog mit het Limburgs geit bemeuje den riskere ze hie det hae bisjop Jo Gijsen tröksjik nao Remunj. En det wille ze hie op de provincie ouch neet. Laot dae Limburger mer op Ijsland zitte, dao kèn hae gei kaod.

Mer good: professor van Hout, dae zag det het mit het Limburgs hel achteroet góng, zeker mit het kalle en het moele van het Limburgs. En dao haet hae geliek in, want het Limburgs plat det geit de baek aaf wie ei sjtök zeip op ein roetsjbaan.

Ich zouw hie Rowwen Hëze kònne parafrasere en zègke: het is een kwestie van geduld, rustig wachten op de dag, dat heel Limburg Hollands lult.

Mer Kupers en ich veer wille eigenlik neet wachte op den daag det het Limburgs bie het aud pepier gezat wurt. Daoróm zeen veer veursjtenjers van het AGL, ein Algemein Gesjreve Limburgs. Want daomit mote veer beginne óm tenminste de taofel, de kommood en de kas te redde oet het brennend hoes van het dialect.

Professsor van Hout dae zuut niks in det Algemein Gesjreve Limburgs. Det is ouch begriepelik want op zien kattelieke universiteit haute ze zich lever baezig óm mit ei fileermetske aagedankde Limburgse wäörd het vel aaf te sjtruipe. Ze höbbe dao ein ganse kolleksie van alle óngerdeile van ein auw boerekar, eine Limburgse pòmpbak of ein sjörgskar. Alles geklasseerd volges het dialectgebeed. En es geer wilt weite in wèlk dörp geer bie de sjmeed ein sjoebkar, sjòpkar, sjörgskar of kroekar kónt besjtèlle, den moot geer daoveur bie de Universiteit van Nijmegen zeen. Dao weite ze det.

Det is allemaol gans interessant mer neet relevant. Want zo'n auwerwètsige houte sjörgskar mit ein iezere reip óm het raad die vèndj geer allein nog mer in Bókriek of in het Limburgs Museum in Venlo.

En es de professsoren klage det het gebroek van het dialect achteroetgeit, den mote ze eigenlik ins oetsjeije óm allein mer de archeologie van het Limburgs te besjtudere.

Natuurlik geit het Limburgs achteroet, want nemes kèn nog kónversere mit auw weurd euver zakes die gaaroet neet meer besjtaon. De paerdentram dae besjteit ouch neet meer, dus höbbe v'r dao niks aan es veer al de óngerdeile van de paerdentram in ei beukske opsjrieve.

In de werkgroep AGL wille veer van die auw aafgelaefde nostalgie aaf. Veer wille waal nog auw wäörd beware, mer in ei nuut verbandj en in ei nuut gebroek. En det zal veural mote gebäöre door sjrievers, theatermaekers, zengers en anger luuj die creatief mit ein taal óm kónne gaon.

Hie op de provincie meine ze det het behaut Limburgse taal op sjtraot of op de universiteite moot gebäöre. Det is ein krimmineel dènkfout zo groot wie ein hoes. En daonao heurs te die auw kaels mer auwmemme en sjnotere euver de achteroetgank van het Limburgs.

De Werkgroep AGL is det geauwtut zo meug wie get kaods. Daoròm höbbe v'r einen eige Limburgse website geäöpend: www.limburghuis.nl . Gaot mer ins kieke op www.limburghuis.nl . Dao sjteit waat veer wille en natuurlik kónt geer ouch mitdoon. En geer krieg het ierste algemein Limburgs waordebook gratis d'rbie.