Frits Criens / Dagblad De Limburger 27 06 2000 / Modertaal 
 
Lulle
 
Rowwen Hèze zingtj het zoeë:Het is ein kwestie van geduld, rustig wachte op den dag, dat heel Holland Limburgs lult.
Röstig wachte tuntj mich versjtenjig, want het doertj waal aeve ier het zoeë wied is det gans Hollandj Limburgs lultj. Det lètste waord is troewes neet sjterk gekaoze ómdet we ónger lulle neet drek versjtenjig kalle versjtaon. De volkse oetdrökking doe luls op erwtesoep óngersjtreeptj det. We neme het Limburgs serieus en het waas kwaolik as Hollenjers oos taal äövernome väör te lulle.
 
Noe bedoeltj Rowwen Hèze het zeker neet zoeë negatief. Ze zinge het volk toe det oeët heel Hollandj
Limburgs lult ómdet ze móste rieme op geduld . Het is dan ouch mer de vraog of de groep zelf gluift in waat ze zingtj. Ich dink het neet. We mótte die tekst ierder figuurlik neme as letterlik: oos taal haet recht op ein volwaerdige plaats in het taallandjsjap van Nederlandj en det zulle angere mótte respektere. Die angere is heel Holland .
 
Limburgs is ein offisjeel erkindje minderheidstaal in Nederlandj sjoeëns neet ederein dao gelökkig mèt is. Eder minderheidstaal haet het lestig väör zich sjtaondje te haoje taege de taal van
de mierderheid en in dae sjtried is Rowwen Hèze eine geweljige ambassadäör väör det Limburgs. Dao zeen mier miense die zich de positie van oos taal aantrèkke. Zoeë sjrieftj de vertaler W. van Roesel zaoterdig in dees gezèt det Limburgers ein minderwaerdigheidskòmpleks höbbe äöver häör taal. Hae is blie det de partie PNL dao get aan wiltj doon. Het Limburgs mót de regering in de gróndjwèt regele wie de plaats
van het Limburgs as offisjeel taal is naeve het Algemein Nederlands.
 
Äöver zón oetsjpraoke kins se in eder geval versjtenjig kalle. Mer dan geit Van Roesel mich mier as ein nationalistiese brök te wied as hae mèt ein Balkan-oplossing kumtj in het geval de regering neet duit waat hae wiltj. Dan mót Limburg zich namelik mer aafsjeie van Nederland en as zelfsjtenjig landj wiejer gaon. Det is geine versjtenjige kal. Det is lulle op erwtesoep .
Door Frits Criens