Frits Criens / Dagblad De Limburger 14 06 2000 / Modertaal
 
Babel
 
Pinkste is het biebels fiëst van de taal. Veurige tónge moke zich meister van de apostele. De heilige geist waas letterlik en figuurlik in häör gevare. Ze begóste te praeke in häör eige taal en miense van anger tale versjtónge häör. Ein nog aojer biebels verhaol, vertèltj van de taore van Babel. In ziene hoeëvaerd wool de miens eine taore boewe dae reikdje tot in de hemel. Mer God waas dao neet van gedeendj en sjtraofde de boewers op ein maneer die alleein Hae kan bedinke. Hae goof de metseliers ein anger taal as de
sjteinhouwers, die weer angers kaldje as de tummermen of de handjlangers. De Babylonische sjpraokverwarring waas gebaore: de versjillendje boewvakkers kóste neet mier samenwèrke en dae taore kwoom noeët aaf.
 
Mèt het wónjer van Pinkste mook Sleefhier de sjtraof van Babel óngedaon, tenminste väör de apostele en häör publiek. Det miense zich letterlik en figuurlik versjtaon, is nog altied versjrikkelik belangriek. Daoväör is het mer good, det we in oos landj ein gezamelike taal höbbe die we allemaol
kalle en begriepe, van Mesjtreecht tot Den Helder en van Enschede tot Den Haag. Die taal, het Algemein Nederlands, is in dit landj de taal van de sjoeël, van het besjtuur van bienao alle media. Het is de taal as Nederlenjers, die beväörbeeldj in versjillendje sjtreke zeen opgegruudj, op ein of anger meneer kóntakt mèt ein höbbe, van miens tot miens of op aafsjtandj. Väöl van die Nederlenjers kalle ouch nog ein dialekt of sjtreektaal mèt miense oet dezelfdje regio. det gebäörtj in dees provincie hiel väöl. Hie zeen intrintj aeve
väöl dialekte as dörpe. Toch sjtale die dialekte zoeëväöl op ein det we zelfs officieel van ein Limburgse taal moge kalle.
 
Det brach de Partie Noew Limburg op ein twiefelechtige gedachte: Limburgs mót ein vak waere op sjoeël. Met waat wiltj de partie dao eigelik mèt winne väör Limburgers en häör taal? We kwome nao de aorlog dankzij het óngerwies sjtilkes aan in ein situatie det het in gans Nederlandj op taalgebeid Pinkste is.
Wiltj de PNL väör Limburg döks trök nao Babel?
Door Frits Criens