Lé Giesen, voorzitter van Veldeke / tijdschrift Veldeke jaargang 75 - 2000 nummer 4
 
Van 't bestuur
 
't Limburghoes
Ónderwiel is d'r door ós, met de Provincie Limburg, 't LGOG (Limburgs Geschiedkundig en Oudheidkundig Genootschap) en 't SHCL ('t Sociaal-Historisch Centrum Limburg), hard gewerk aan 't totstandbringe van 't Limburghoes, wao-in weej haope krachtige, professionele óndersteuning veur ós werk te vinde, ónder mier op weitenschappelik en adminstratief gebied. Det Limburghoes is d'r jaomer genóg nog neet. D'r zitte toch mier gater in de waeg as gedóch.
 
De streektaalfunctionaris
Weej zien al zo'n jaor of twieë met de Provincie in gesprek euver zó'nne mins. Emes dae deskundig is op 't terrein van 't Limburgs en zich bezig halde kint met de óntwikkeling van ós taal en de daoveur nuuëdige progamma's. Gelökkig meuge weej de streektaalfunctionaris alvas gaon aanstelle.
 
De PNL kint Veldeke neet
't Waas bitter te ervare det Veldeke veur de Partie Niej Limburg (PNL) kinnelik neet besteit: zeej nome 'n initiatief op 't terrein van 't Limburgs met 'n op zich zelf al umstreje veurstel euver 'n Algemein Geschreve Limburgs, det ós zoel mótte leie nao' n saort standaard Limburgs op termien. 't Veurstel waas daobeej ouk nog slech ónderbouwd. Vaerder in dit nummer steit heej euver 'n oetgebreidere reactie.
Ergerlik waas nog det zeej met eur veurstelle euver 't Limburghoes en de streektaalfunctionaris gauw 'n iererundje woele loupe veur 'n stök werk det ze neet gedaon hebbe.
 
Veldeke wuurt 75
Kómmend jaor bestaon weej 75 jaor. Det wille weej viere. Met 'n Veldeke det beej d'n tied is en ouk met vuuël activiteite in al ós Kringe. Dao huurt geej nog van.