Waor of neet waor aflevering 421

donderdag 02 januari 2003

Paul Prikken

naaksj kómme

[A = GOED]

Op het ènj van het jaor höbbe v'r hie ummer personeelsfies bie L1. En dan kieke v'r altied wae naaksj kump. 't Is dan waal ei bitje kaud mer het is ummer gans gezèllig es d'r väöl collega's naaksj kómme. Noe dènke de loesteraers det het hie eine santepetik, ei sjpashoes of ein horetent is, mer det is het neet. Naaksj kómme beteikent: zónger partner, zónger diene man of dien vrouw nao ei fies gaon.

[B = FOUT]

Naaksj kómme. Dao kriege richtige kaarters de begaovinge van. Dan höbs te eine aan de taofel zitte dae mer EIN troefkaart haet, mer hae deit es went hae einen houp troeve in de handj haet. En óm te bluffe kump hae naaksj. Hae sjmit die ein gooj kaart van häöm ouch nog direk op taofel en die anger die sjnappe d'r gaaroet niks mier van. Det beteikent naaksj kómme: bluffe zónger get achter de handj te höbbe.

[C = FOUT]

Wae of waat kump naaksj? Inderdaad: es me gebaore wurt kumnp me naaksj op de waereld. Ónsjöldig, me wèt nog van niks. En det zaet me ouch es emes get later in het gezelsjap kump en neet wèt waat dao vanteveure besjpraoke is. Dae wèt van niks en dan probeert dae ouch nog ins ei wäördje mit et kalle. Dan zèkge die angere: doe kumps naksj. Doe wèts neet wo-euver het geit. Naaksj kómme beteikent dus: dich in ein debat of ein cónversasie minge, zónger kènnis van zakes.

[OPLOSSING = A]