Waor of neet waor aflevering 423

maandag 06 januari 2003

Paul Prikken

örges op eine bessemsjtek aankómme

[A = FOUT]

Noe moot ich toch ins get vertelle van oos tant Nel vreuger. Die kaom in de femilie ummer op häöre bessemsjtek aan. Ze woort neet gaer geneud want ze hauw euveral kritiek op. Nörges waor het proper genóg. Mer sóms bie ei kemuniefees moos tant Nel toch gevraog waere en dan kaom ze op häöre bessemsjtek aan. Ze waor kaum bènne of ze hauw al euveral gezeen wo det er nog ei bitje sjtöp laog, wo ei gedrien get sjeif hing. Es ze kós zouw ze direk de bessem pakke en het hoes aan kant doon. En det leet ze dan ouch good mirke. Zo van: het is hie ummer gezellig want det vinje de sjpinne ouch. Of: van dae vloer gaot g'r nog väöl plezeer höbbe, dae zal zeker neet sjliete es 'r noets gesjrób wurt. Jao tant Bel kaonm ummer op de bessemsjtek aan: ze hauw altied kritiek op het óngerhaut van emes angers zien hoes.

[B = FOUT]

Waat, of lever wae vluug op eine bessem? Wae gebroek eine bessem in de plaats van het openbaar vervoer? Juist, lieve kindertjes: ein heks! Wae kump dus örges op eine bessemsjtek aan: een heks. En waat brunk ein heks? Niks goods! En de oetdrökking: ze is dao op eine bessemsjtek aangekómme gebroek me veur vrouluuj die kaod sjtichte, veur vrouluuj die die de luuj aaneinhange, die ummer baezig zeen ruzings te sjtaoke door anger luuj te bekalle.

[C = GOED]

't Is hie toch waal ei bezónjer vrouwonvriendelik programma! 't Wónjert mich det d'r überhaupt nog dames belle naodet zie veur de zoeväölste kier door deskundige A en B geschoffeerd zeen. Es er noe dadelik toch nog dames belle, dan kónne die mit ei gerös hert veur oplossing C keze, want de oetdrökking wurt zowaal veur mansluuj es veur vrouluuj gebroek. Me kèn ouch zèkge: hae is dao op eine bessemsjtek aangekómme. Det beteikent: emes is örges gans berooid, gans erm en kaal aangelandj. Me zaet het dèks van emes dae vreuger gans erm waor en zich opgewirk haet, en daonao van greutsjigheid anger luuj neet meer zuut sjtaon.

[OPLOSSING = C]