Waor of neet waor aflevering 425

woensdag 08 januari 2003

Paul Prikken

op eine platte sjpele

[A = GOED]

Einen term van de doevemilkers. De doevepitte ónger de loesteraers die weite nog waat 'ein platte doef' is. Ein platte doef det is ein doef die's te twee waeke höbs bènneghaute en zo min meugelik aete gegeaeve höbs. Es te die dan inkörfs en misjiks veur ein vlöch dan verrek det bees van den hónger en het probeert zo rap meugelik trök te vlege. Mer dao waor ouch ei risico: namilik det het bees óngerwaeg völlig zónger energie veel en dan sjeijde die oet mit vlege en góng örges op ei veldj zitte óm te fouragere. Op eine platte sjpele beteikent dus: väöl risico numme, hoog inzètte, alles of niks sjpele.

[B = FOUT]

Deremishanjelaer! Die platte doeve van dich dao klop gaar niks van. Nei, den term kump van het kaarte. Op eien platte sjpele beteikent dets te probeers eine gans van de taofel te sjpele. Es te in de gater kriegs det eine al dèks verlaore haet, probeers te dem van de taofel te kriege. Sjpeels neet meer óm zelf dien pötje te wènne mer óm daen angere te laote verleze. Het beteikent dus: op de zjwaakste sjpele, de zjwake plekke van emes oetbuite.

[C = FOUT]

Op eine platte sjpele det zaet me noe sóms nog in de famfaar. Es eine blaozer neet hel genóg op zien träöt bleus mer zomer get mitbleus zónger väöl enthousiasme, zónger väöl energe dan zèkge ze: doe bès op eine platte aan het sjpele! Het beteikent dus: gein energie höbbe, geine zin höbbe in get.

 

[OPLOSSING = A]

Det verhaol van die doeve det klopde van geins kenj. Mer het antjwaord waor waal good: väöl risico numme