Waor of neet waor aflevering 428

maandag 13 januari 2003

Wim Kuipers

Sjnurk

[A. FOUT]

Eine sjnurk dan mótte veer automaties aan sjnurke dinke. Det doon meis kaerels. Vrouwluuj sjnurke neet meine ze zelf. Kaerels dus, aojer kaerels, en die doon det dökker euverdaag, wen ze neet nao boete kónne. Dus neet ECH sjnurke, mer mómpele, knoterpotte. Eine sjnurk is eine aoje kaerel dae ummer lik te mópperkóntje.

[B. FOUT]

Det is ein verklaoring van nieks. Zoeget wie: wo kump 't waord FIETS vandan? FIETS: dao vloog hae mich veurbie. Dao kan me op d'n tillevies mit blietse, mae sjnurke is serieus. 't Kump van sjnorre dink aan 't geluud. En waat sjnorde hiel vreuger? 't Sjnoor snoer van 't sjpinnewiel. En waat kan me mit ei sjnoor? Eine sjneure sjitterend Limburgs: eine te graze numme, snoeren, sjtrikke. En waem deej det? Ja? Dudelik noe? De sjnurk: det woor de veldjwachter.

[C. GOED]

Wat mót ich taenge deze gelierde kal nag inbringe? De waorheid is: 't is ei gans biezunjer waord, aafkóms ónbekind, zoewie ei kiendj van eine Russische sjeldaot of zoeget. Is ouch gebäörd. Ganse tv-series euver luuj die häöre vader in Canada gaon zeuke, aorlogskienjer, mae die Russe hie in viefenveertig, die hauwe ouch gein betónge bóks. En dan kós zoe maedje waal de sjnurk d'rveur haoje: baatde neet. Eine sjnurk, det is eine grote plak ofwaal omslagdoek.

[OPLOSSING: C]

Het woord sjnurk komt voor in de Peel en staat o.m. in het kleine woordenboek van Helden. Plus de taesesjnurk: zakdoek.