Waor of neet waor aflevering 429

dinsdag 14 januari 2003

Wim Kuipers

Dae veurt op sjmaal besjlaag

[A. FOUT]

Besjlaag det is Nederlandjs beslag - veur get te bakke: aoliekeukskes, waofele. Onnag get angers. Vreuger, wies in de jaore vieftig, wie d'n tied ermer woor, op de dörper, dao haolde me zich gein klaor flaaj bie de bekker, det kós me neet betale. Nae me brach d'n deig en de keerse of proeme of kroonsjele, sjtaekbare, of miemerte, wo de flaaj van gemaak mós waere, die brach me nao de bekker. En veur ein broelof of de kèrmis deje de boere det mit paerd en ker. Dieke boere mit väöl femilie lete veur de kèrmis waal ins dertig flaje bakke. En dan goof 't kleiner miense, of die wienig femilie hauwe of ruzing mit alle breurs en zösters, die sjpande waal 't paerd in, mae waat ze te bringe hauwe, kóste ze baeter in eine korf doon. Bienao nieks, sjmaal beslaag zoegezag, mae waal mit paerd en ker nao de bekker vare. Dus die oetdrökking beteikentj: zich groter veurdoon es me is, of: opsjöppe.

[B. FOUT]

Waat ei verhaol euver nieks. Besjlaalg is besjlaag likge op get. Allewiel geit det um loonbesjlaag mae vreuger wie wienig miense in loondeens wore, doe kós me wens te van emes geldj tegooj hauws, beslaag laote likge op get angers. Op de opbrings van ein sjtök kaore, op twie verkes, of bie de sjlechter op de verkes die hae ingekoch hauw, bie de sjnieder op 't sjtóf det saort dinger. Mae wens te ei bietje grote moel hauws en geine goje affekaot, wenste in zoen rechszaak gein bein hauws um op te sjtaon, dan zag me: dae veurt op slech besjlaag: gein gooj raeje um eine angere aan te klage.

[C. GOED]

Allei luuj die good zien in de Limburgse taal weite waat besjlaag nag wiejer is. Ein herseblojing of ze inins op de kop gesjlage waers, en 't besjlaag van: ei paerd besjlaon, of van die iezerkes ónger de sjoon det de zaole neet zoe gauw sjlete. En ouch: de reip, de bandj um ein ker. Dae woor van iezer en det woor duur vreuger, det kós me neet oet de bós haole. Dus lete kleiner buurkes zich ein ker make mit sjmaler rajer en eine kleinere bandj. Hoofde 't paerd, det toch al minder haver kreeg, neet zoe hel te trèkke. Dae veurt op sjmaal besjlaag beteikent dus geweun: erm zien.

[OPLOSSING: C]