Waor of neet waor aflevering 432

vrijdag 17 januari 2003

Wim Kuipers

Doorsjlaag

[A. FOUT]

Waat eine sjlaag: det heurt me dökker wen eine jónge miens plotseling gesjtorve is beveurbeeldj. Of: ei besjlaag gehad haet: herseblojing. Kump van d'n dóndersjlaag. Meistes einen helle sjlaag veurop en dan reutelt 't gevaor weg. Mae 't kump ouch veur det nao det gepruttel nag eine väöl hellere kump, en det neume veer d'n doorsjlaag. Eine finale sjlaag van d'n dónder.

[B. FOUT]

Dónder kan nut zien, mae waat ich uch vetèlle mót is gei leuk verhaol. 't Is waal ei intersant waord. Efkes oetlige. In deile van 't Zuje, en det begint al bie Ech, dao hit waat in 't naorde eine var is, sjtier: eine duur. En wen zoe'ne duur gesjlach mós waere, det woor neet maekelik. Veur dem um te likge hauw me eine iezere pin, dae kaerels die det dörfde in de herre- de herses, de kop van daen duur sjloge. Dan mós me dök hel houwe: eine goje doorsjlaag gaeve. Bie det door van doorsjlaag dink me ouch aan 't Sjpaanse torro veur sjtier of duur.

[C. GOED]

Laot ich 't noe aevezier euver eine pin höbbe. Kós waal aafgesjpraoke zien. Mit eine pin kóns te neet allein ein koe kasjewiele make, mae ouch gater sjlaon in bleek of dun koper. En det grei kós me dan róndj buge, zoeget wie me de henj ineinesjleit veur water op te vange, en doot geer uch heim die henj ins zoe, en dink det dao gaetje in zitte, waat zeet geer: eine primitieve vergiet, wo de Mesjtreechtenere zeijbaor taenge zèkge. Die wore ós veuroet, die baorde die gaetjes, neet sjlaon. Ofwaal: doorsjlaag is vergiet.

[OPLOSSING: C]