Waor of neet waor aflevering 435

woensdag 22 januari 2003

Sjtiefte

[A. FOUT]

Sjtiefte: det waord höb ich al jaore neet mie geheurd. Kump zeker door de emancipatie van de Limburgse moekes sorry: vrouwluuj. Die zèkge het allewiel de kaerels waal, zeker vandaag in 't sjtumhökske. En wen die neet loestere, vertrèkke ze. Weg voert: dao kump waal eine nuje. Vreuger neet. Doe dórste de vrouwluuj nieks te zèkge. Maondjelank zote ze heim te sjtiefte: pruilen, mokken. Wo dach geer det 't waord stiefmoeder vandan kump? Det woor dök ouch zoe'n óntevreje muibel.

[B. GOED]

Ich weit woos doe mit in de wór bös, mae laote de loesteriers det oetmake. Sjiefte leef luuj, dan mót geer dinke aan waat noe bie de foetbal gezag waert: eine bal euver de kieper stiften. Gank det neet opzeuke: det is Rótterdams Ingels. De Ingelse zien det waord vergaete, veer neet. Sjtiefte is: wegrenne, op de luip gaon, mae ouch: zich wegsjtrietse, sjtiekem weggaon, en dink dan aan dae bal euver de kieper haer. Sjtum op mich.

[C. FOUT]

Zeker neet. Eine bal dae wegrent: zit dao einen haas in? Mae es doe gekaoze waerdes, doe hools 't geine maondj. Kós te nao 't kloester. Dao mótte veer ouch haer, nao Thorn, Toeër, dao hauw me 't Stift, 't kloester van die deftige begiene. Wen me gei blood hauw zoe blauw wie kaoreblome, hoofde me dao neet aan te kómme, bie det stift. En sjtief det die dames wore, sjtief. Waal deftig sjtief, en det is sjtiefte: zich heel veurnaam gedrage, wie de adel.

[OPLOSSING: B]

't Waord sjtiefte kump veur van Kirchroa wies veurbie Venlo. 't Duits haet: stiften gehen: vluchten, ertussenuit knijpen.