Waor of neet waor aflevering 439

dinsdag 28 januari 2003

Paul Prikken

huker

[A = FOUT]

Den huker det heurt bie het meubelaer of het gesjeer van de boere. Es ze vreuger de keuj in de wei gónge milke naome ze einen huker mit: ei milksteulke op drie peut. Dan zats te dich op den huker en dan kóns te gemaekelik aan de ujer van de koo. Kóns ein koo natuurlik ouch likgend op dien rök milke, mer op einen huker is het toch gemaekeliker.

[B = GOED]

Huker kump van hoeke of huke: zich hurken, wegduke. Liever blode Jan dan dode Jan. Einen huker is dus emes dae wegduuk, dae de sjtart intruk. Dae zich op den achtergróndj hilt. Den underdog.

[C = FOUT]

Ja dudelik ei waord det de Ingelse van de Limburgers höbbe euvergenómme. Mer dao höbbe ze van huker 'hooker ' gemaak. Ich höb eine kènnis dae aaf en toe nao de maedjes in Luuk geit ómdet hae gaer multicultureel internasjonaal contacte haet. En noe het zoe gojekoup is óm mit Ryanair te vlege kump hae ouch al ins bie de hookers in Londen. Ein huker, of einen huker is eine man of een vrouw die emes aan de haok sjleit. Mer in Limburg beteikent het neet hetzelfde es in Londen. In Limburg beteikent huker: bedreger of bedreegster. Emes dae dich ónger valse veurwènsels get aansjmaert.

[OPLOSSING = B]

huker: iemand die wegduikt