Waor of neet waor aflevering 440

woensdag 29 januari 2003

Paul Prikken

oet de luts gaon

[A = FOUT]

Oet de luts gaon. Dudelik ein militaer oetdrökking die vreuger woort gebroek bie het regiment van de Limburgse jagers. De luts det beteikent 'de pas'. Es de Limburgse jagers mooste marsjere hauw de sergeant ummer ei sjtök kriet bie zich en dan sjreef hae op de sjoon van zien peleton een L veur lènks en ein R veur rechs. De waor dudelik. Mer toch lepe d'r sómmige oet de luts, oet de pas. Det kaom ómdet die neet kóste laeze. Oet de luts gaon beteikent dus: uit de pas marsjere.

[B = FOUT]

Dank u wel namens het regiment Limburgse Jagers. Ze zulle dao blie zeen es ze door deskundige A aafgesjilderd waere es ein bende analfabeten.

Nei: de luts det waore vreuger de litjkes womit ein klepbóks -ein klepbroek- vasgehaute woort. Me zaet dao ouch sjnelsjietert taenge, ómdet me allein mer de lutse van die klep hoofde los te make óm nao de WC te gaon. Oet de luts gaon beteikent dus: oet de bóks gaon.

[C = GOED]

Och die Limburgse Jagers die gaon waal ins oet de luts. Veural 's aoves aan den teek es ze get pintjes beer gehad höbbe. Het beteikent: oet de bandj sjpringe, de vot ins good oetsjmiete, zich ins good loslaote.

[OPLOSSING = C]

oet de luts gaon uit de plooi gaan / uit de band springen / uit het fatsoen gaan / Tungelroy