Waor of neet waor aflevering 443

maandag 03 februari 2003

Paul Prikken

knoepe

[A = FOUT]

't Is neet het appelesezoen mer kóns toch nog altied ein eppelke of ein paer knoepe. Die kómme oet Zuid-Afrika of oet Australië. Knoepe beteikent: ein hel vruch oet de voesj aete. Heurs det ouch es emes einen appel aan het knoepe is. Zal ich het ins veurdoon? Het klink zoe.

[B = GOED]

Fatsuunlike luuj aete einen appel mit mets en versjet. Es te al die onbelaefde die gein taofelmenere höbbe op einen houp zouws goje en zouws ze knoepe, dan zouws te d'r nog geinen euro veur kriege. Knoepe beteikent get bie den houp koupe of verkoupe, zónger det het precies getèld of gewaoge is. Vreuger knoepde de boere bieveurbeeld ein kar krote of eine bak aerpel. Kós d'r dien veurdeil of dien naodeil aan höbbe, mer es te het precies zouws gaon tèlle waors te nog meer geldj kwiet aan den tied dae det kosde.

[C = FOUT]

Knoepe det is hetzelfde es het Nederlandse 'ontpitten'. Es te keerse- of proemekónfituur maaks moos te die keerse of proeme eers knoepe, d'r de knoep of de pit oethaole. Vreuger dege ze det mit ei metske. Mer noe höbs te dao ouch apparaetjes veur, óm te knoepe.

[OPLOSSING = B] 

knoepe (Heerlen) bij de hoop (ongeteld) kopen of verkopen