Waor of neet waor aflevering 450

woensdag 12 februari 2003

Paul Prikken

van de graot valle

[A = GOED]

Ich zal de Limburgse medische encyclopedie d'r ins biepakke. Lètste editie, 28 deile en ich hoof neet wied te zeuke. Onger de lètter A sjteit het al: anorexia nervosa: aetsjtoornis wobie de patiënt van de graot vilt. Sjerk vermagerd. Remedie: boterhamme mit sjroop, rommedoe en geitekeeskes.

Van de graot valle beteikent dus: sjterk vermagere.

[B = FOUT]

Noe val ich toch van de graot, noe valle mich de sjoon oet, noe vilt mich de bóks aaf!

Wie kóns te zoeget biejeinfantesere, wie kóns te zoeget biejeinkrieme!

Van de graot valle det is eine oetroop van verbazing. Det zaes te es emes get vertèlt det gaaroet neet meugelik is. In dien geval: gans gelaoge is.

[C = FOUT]

Van de graot valle beteikent: in onmin valle. Bieveurbeeld eine sjoonzoon dae ummer bie de femilie good aangesjreve sjtóng mer dan mit anger vrouluuj geit sjarrele: dae vilt dan bie zien sjoonmoder van de graot. Dae haet dao zien erte oet. Dae hoof dao neet meer te kómme, dae is dao in onmin gevalle.

[OPLOSSING = A]

van de graot valle: sterk vermagerd zijn