Waor of neet waor aflevering 452

vrijdag 14 februari 2003

Paul Prikken

katsmedam

[A = FOUT]

Om dit waord te begriepe moot ich ingaon op de versjillige fases in het laeve van ei vroumesj. Ze beginne es maedje, daonao waere ze juffrouw, daonao medam en es ze neet in het kloester gaon eindige ze es aud wief. Noe is er in het laeve van een vrouw ein periode wo-in ze in de 'katsmedammentied' is. Det is den euvergank tösje juffrouw en medam. De juffrouwe zeen dan kats of kattig, ze zeen achter in de twintjig ze sjtaon op het puntj medam te waere. Mer eigentlik wille ze det neet. Het zeen lestige vrouluj en dan zaet me het is ein katsmedam, ein lestige juffrouw. Ein vrouw die nog jónk wilt blieve mer het eigenlik neet meer is.

[B = FOUT]

Deskundige A haet weer gescoord in dit vrouwonvruntjelik programma. Det kós ós weer minstes 500 vrouwelike loesteraers. Proficiat.

Es v'r dae katsdeskundige nog einen tied laote doorgaon höbb veer gaaroet gein loesteraers mier.

Nei, nei: ein katsmedam det is de vrouwlijke concierge in ein studentehoes of ein gezèllehoes. De óngetrouwde kómpels die es gastarbeider nao de koele kaome die gónge dèks in de kos bie ein 'katsmedam', ein vrouw die kamers verhuurde en ouch ei bitje veur de wesj en het aete van die mienwirkers zörgde.

[C = GOED]

Nei, nei. Mit ein katsmmedam is het hetzelfde es mit goud en antiek. Höbs ech goud, of echten antiek... mer höbs ouch naomaak. Get waat d'r oetzuut es went het ech is. Det höbs te dus ouch mit medamme. Ein echte medam det is ein authentieke medam, bekans ei bitje van adel, good opgetrokke, mit fiene menere en sjoon kleijer.

Ein katsmedam det is naomaak. Det is ein medam die gaer veur medam wilt sjpele, mer het neet is. Naomaak, imitatie dus. De kènners die zeen het óngersjeid en die zèkge dan: det is ein katsmedam. Wie Hyacinth Bucket 'Bouquet' in 'Keepeng up apearances' (Schone Schijn).

Daen erme Richard, dae is mit ein katsmedam getrouwd.

[OPLOSSING = C]

Katsmedam: woord uit Maastricht

Waar het woord vandaan komt is niet meteen duidelijk. Men denkt det 'kats' in de oude betekenis hetzelfde als 'vals, onecht' betekent.