Waor of neet waor aflevering 453

maandag 17 februari 2003

Wim Kuipers

Brieje

[A. FOUT]

Vreuger op sjoel lierde me det de Nederlandjse lang ij in 't Limburgs ein ie is. Dudelik: oos ies is ijs gewaore, neet angersterum. Mae noe: paleis mit kórte ei is meis pelies, wie 't Ulepelies in Remunj. Väöl luuj sjpraeke van eine sjtiele berg, en in Zitterd haet me 't Tempelplien: plien plaats plein. Zoe guf 't hóngerde luuj die van brieje kalle, veur breien, umdet ze sjtrikke ein aojerwits waord vinje. Me heurt dan: Oma woor zich ein möts aan 't brieje.

[B. GOED]

Ich höb mit bedraag geloesterd, en doe woors d'r bienao. Brieje haet te make mit verbrijzelen, en det haet ein lang ij. Eine d'n daets verbriezele, de kop inhouwe mit zoene houtere knots mit naegel d'rin, in 't Vlaoms goedendag geheite. Gojendaag jao, det zóls te nag mótte mitmake. Is neet mie, waal brieje: de aerpel brieje of de kólleraap: verbrijzelen, prakken.

[C. FOUT]

Brieje det is gei waord van de zandjgróndj. 't Kump van berrie, det is ei draagbaar, en dus is brieje ein verkórting van berriën: mit ein draagbaar greunte wie moos of aerpel van 't landj drage, umdet det landj te naat, te zómpig woor veur paerd en ker, jao zelfs veur de sjörker of de sjoebkar. Daoveur kump det neet op de zandjgróndj veur: dao waert 't neet zoe naat. Me zuur det waal nag op toeristische kaarte oet 't naorde van Hollandj: zoene berrie vól mit bul kies of moos.

[OPLOSSING: B]

De beteikenis is letterlik: get wie brie make: brij. Dink aan balkebrie.