Waor of neet waor aflevering 456

donderdag 20 februari 2003

Wim Kuipers

Dae haet bie ós gebrónk

[A. FOUT]

Dae haet nag bie ós gebrónk: det zól eine aoje miens gezag kónne höbbe, dae drei veer döchter hauw. Mie sjoenvader hauw d'r zös, en dao keme geregeld kaerels brónke. Dink ins aan de bronst van dere dae noe weer geit beginnne of al begós is, die waere ouch jaor nao jaor bredsiger, breusiger: det saort wäörd, en dus is: dae haet bie ós gebrónk: haet bie ós wille vrieje.

[B. GOED]

Wie zoe vrieje? Dachs doe det die kaerels vreuger get dörfde? Nieks: hendje vashaoje en sónjis netjes nao 't lof. Daonao gónge ze ei veurzichtig sjträötje um. En dan trouwde ze, en dan hauwe ze eine neudig veur te brónke. Waat woor det? Getuge zien bie ein huwelik.

[C. FOUT]

Getuge, vrieje: dink ins aan de naam Bronckers. Eine van oos deputees hit zoe: Bronckers: eine wirknaam, naam van ei beroep, wie Snijders, Beckers, Rademakers, Kupers, Schuster, Brouwers neet te vergaete. Mae oets geheurd van Vrijers en Zoeners of Punemans? Nae nae: de brónker woor bie ós de kopersjlaeger, en dus: dae haet bie ós nag gebrónk is: dae man haet bie ós 't koperwirk gemaak of gerepareerd.

[OPLOSSING: B]

Det waord is hetzelfde wie de brónk: de percessie, en ouch wie pronken.

Brónke is wiejer: mokken, pruilen, mae det is neet gezag.