Waor of neet waor aflevering 460

woensdag 26 februari 2003

Paul Prikken

de naolj in het sjpek sjtaeke

[A = FOUT]

De naolj in het sjpek sjtaeke beteikent hetzelfde es het mets in het verke laote sjtaeke. Aan get beginne mer het neet aafmake. Vreuger woorte de zieje sjpek aan de plefóng gehange óm ze te laote dreuge, En dan deeg me mit ein naolj ein touw door det sjpek. De hoesvrouw die moos al det wirk doon, mer es ze het neet aafmaakde dan zag me: ze haet de naolj in het sjpek laote sjtaeke.

[B = GOED]

De sjnieder, de kleijermaeker van vreuger, dae hauw zien naolje en zien gare en waat heij dae nog in zien sjniederwirkplaatsj? Zjus: dae hauw dao ummer ouch ei sjtök sjpek likge. En woveur deent det? Det deende es 'speldenkussen'. Want de naolje van vreuger die rosde. Dao waor nog gein stainless steel, roestvrij staal, en die naolje die rosde det het verrek. Dus es de sjnieder zien naolj neet meer neudig hauw dan sjtook hae die in het sjpek. Zien naolj in het sjpek sjtaeke beteikent dus: oetsjeije mit wirke. Me zaet ouch het paerd oetsjpanne of: de kar bènnevare.

[C = FOUT]

Hauf good mer toch gans verkierd. 't Klop det het ein oetdrökking van de sjnieder is, mer veur de res is dienen oetlèk gans fantesie. De sjnieder dae niejde de kleijer terwiel hae op de sjniederstaofel zoot en dan hauw hae de sjtóf op ziene sjoot. En dan gebäörde het waal ins det de sjnieder mit de naolj in zien eige batse, in zien eige sjpek sjtook. Auw, reep de sjnieder dan: 'ich höb de naolj in het sjpek gesjtaoke". Het beteikent dus: ónhenjig zeen, lómp, ónbeholpe te wirk gaon.

 

[OPLOSSING = B]

de naolj in het sjpek sjtaeke / ermee ophouden