Waor of neet waor aflevering 461

donderdag 27 februari 2003

Paul Prikken

mit het gebaet vare

[A = FOUT]

Mit het gebaet vare beteikent eigentlik hetzelfde es: de beste stuurlui staan aan wal. Luuj die het baeter weite kónne waal mit hunne móndj, hun gebaet, oetlèkge wie het moot mer es ze zelf het paerd zouwe mote besjture zouwe ze d'r niks van terech bringe. Het zeen de moeljannese die mit het gebaet vare.

[B = FOUT]

Mit het gebaet vare beteikent: veurzichtig zeen, neet gans tot het oeterste gaon, dien krachte sjpare. Hae veurt mit het gebaet beteikent dus: hae hilt zich in, hae kan baeter mer hae hilt nog get achter de handj.

[C = GOED]

Mit het gebaet vare beteikent: sjtreng zeen, autoritair zeen. Es te ei paerd veur de kar höbs sjtaon det nogal köpsj, nogal eigezinnig is, dan moos te det mit het gebaet vare. Aaf en toe ins good aan den toum trèkke zoedet het paerd det good aan het gebaet in zien moel veult. Me zaet het dus ouch van luuj die eigezinnig zeen mer die duchtig aangepak mote waere en die me geine vinger maog gaeve of ze pakke einen erm. Die moos te mit het gebaet vare. Zoe zeen d'r hie ouch op de radio en toevallig zitte twie exemplare daovan noe hie bie mich in de studio.

[OPLOSSING = C]