Waor of neet waor aflevering 462

vrijdag 28 februari 2003

Paul Prikken

eine achter de bessem zètte

[A = FOUT]

Eine achter de bessem zètte det beteikent: eine aan het wirk zètte. Es te zoe'ne luije lapsjwans in hoes höbs dae mit zien luij vot allein mer op de sofa lik, dan moos te dae achter de bessem zètte. Hie jóng, pak dich de bessem, kaer het hoes, doog ins get!

[B = GOED]

Ich höb ei naefke, Baer, dae gelökkig getrouwd is, mer dae toes niks te vertèlle haet. Zien vrouw Julia, die haet häöm direk nao den trouw achter de bessem gezat. Hae haet ocherm de bóks mote inlevere.

Baer dae is achter de bessem gezat: det beteikent eigentlik det hae in de bessemkas nog achter de bessem sjteit. In de hiërarche van het hoeshaute haet de bessem nog mier te vertèlle es Baer. Baer zit ónger de plak.

[C = FOUT]

Pas op of ich zèt dich achter de bessem! Det höb ich vreuger es jungske dèks mote heure. Van de mam en de pap toes en van de meister op sjool. En ich höb ouch dèks ochter de bessem gesjtange. De bessem dae sjtóng in den hook van de kamer of van het klaslokaal. Eine achter de bessem zètte beteikent dus: eine veur sjtraof in den hook zètte.

[OPLOSSING = B]

eine achter de bessem zètte / iemand onder de plak houden