Waor of neet waor aflevering 471

woensdag 12 maart 2003

Paul Prikken

óngerbinjel

[A = GOED]

Kèns det karnavalsleedje 'mit eine beerboek wurs te neet gebaore'. Det is ei leedje mit väöl laeveswiesheid want het vertèlt dets te meujte moos doon óm in het laeve get te bereike. Moos jaore investere in pils óm oeteindelik ein beerpens te kriege. Det is den óngerbinjel, de moraal van het leedje. Den óngerbinjel beteikent dus den achtergróndj, de basis, de oorzaak, de depe beteikenis van get.

[B = FOUT]

Meneer de filosoof mit zien beerpens dae kan waal einen óngerbinjel gebroeke. Einen óngerbinjel is ummers eine boekbandj veur mansluuj. In het geval van vastelaovesbeerpense hilt den óngerbinjel de derm ei bitje biejein. Angers kriegs te breuke ónger de beerpens. En in het krankenhoes zeen ze neet blie es ze breuke van beerpense mote operere, want dan moot de chirurg eers door veer laoge vèt sjnieje.

[C = FOUT]

Het deit mich plezeer det deskundige B in de katteloog van Wolf en Herzdahl mit de herenlingerie van 1910 is gaon kieke. Allein: hae haet verkierd gekeke. Want den óngerbinjel is einen auwerwètsige sokophouder. Wie de vrouluuj nog jartelle droge óm de nylons op te houte hauwe de hiere óngerbinjels op hun zök op te haute. 't Is dus zoe'ne bandj mit klipkes dae baove de kuut mer ónger de knee zit en wo de hiere hun zök aan vasmaakde.

[OPLOSSING = A]