Waor of neet waor aflevering 472

donderdag 13 maart 2003

Paul Prikken

oetbinjel

[A = GOED]

Ich höb det gistere hie toch al bekans oetgelag mit het waord óngerbinjel en dae beerboek. Mer ich zal het veur de loesteraers nog ins doon. Namentlik det den óngerbinjel de moraal van de beerboek is en es te dich good aan het dieet veur eine beerboek hils dan zuls te op den doer ouch beloond waere mit den oetbinjel, mit het resultaat, de oetkóms, de ontknoping. Moos geweun kónsekwent dien dieet van teen pilskes per daag blieve volge en neet opgaeve. Dao is wilskrach veur neudig, mer aan het enj van de inspanning höbs te ouch den oetbinjel: ein sjoon dikke beerpens.

[B = FOUT]

Zeen ich det verkierd es ich zèk det hie emes in de studio zit mit ei 'beerpenssyndroom'? Emes dae gaer tot de jetset van karnavalverend Limburg zouw wille beheure mer daoveur neet in aanmirling kump ómdet hae den oetbinjel veur die promotie mis. Kiek, es te prins karnaval wils waere is het neet genóg dich ein beerpens biejein te zoepe. Moos oetbinjel höbbe, feeling, geveul, intuïtie óm zjus op het good moment de gooj besjlissing te numme. Es te die sosjaal vaardigheid zouws höbbe -mer doe höbs die neet- dan zouws te mit dien feeling, dienen oetbinjel, hoegerop kónne gerake.

[C = FOUT]

Ich waer hie toch ei bitje depressief van, twie daag achterein euver beerpense moele es went det de toeristische attractie van Limburg is. Dees oetzending is erg normbevestigend veur de Hollenjers. Ze bevestig waat de Hollenjers ummer van ós gedach höbbe: det veer brallende zoeppense zeen. Det is den oetbinjel, het veuroordeil dets te mit dit saort misplaatsjde grappe kriegs. Oetbinjel is dus: veuroordeil, veuringenommenheid, ein oordeil det neet op de wirkelikheid gebaseerd is.

[OPLOSSING = A]

oetbinjel: uitkomst, ontknoping, resultaat, uitleg