Waor of neet waor aflevering 476

woensdag 19 maart 2003

Wim Kuipers

Derf

[A. GOED]

Getverderrie waat ei vies waord. Geer mót aan derrie dinke: kleffe nate troep. Derf bótter: die is duchtig geknaejd.

Derf is dus naat, klef, ei bietje weik.

[B. FOUT]

Sjiek waord veur de insigste taalkundige. Derf: det is waat taalmeister Kupers de wanjelende R neump, wie in Vlodorp = dorp. En wo veer de sjpRaot van ein leier taenge zèkge, is in 't Nederlandjs spoRrt. Kónklusie: derf is eigelik dref, dreft in 't Ingels, wo me de aafwas mit kan doon, en loer in 't Ingels waordebook bie draff (sjpraek oet wie draef), dao zuut me 't waord spoeling sjtaon, en det is oos derf: 't water waat euverbleef naodet 't ujer en de eimere en tuite van de milk gesjpeuld wore: det sjpeulsel woor nag good veur de verkes.

[C. FOUT]

Ich bön bang det ich d'n angere kantj op mót. Die leier die geneump is, dao zitte nag ummer sjpraote in, mae ze zien noe van aluminium, die leiers of lödders. Vreuger van hout, 't goof d'r van 40 sjpraote en wo mós me die laote, sjwintjers? Inklappe kós neet. Die hónge daoveur ónger de oetsjtaekende panne van de sjuur. Neet allein umdet ze zoe lank wore, nae: die móchte neet derf waere, al te dreug, dan broke ze. Derf: det waert gezag van hout det hiel dreug is en dus maekelik brik.

 

[OPLOSSING: A]

Derf staat o.m. in de woordenboeken van Meijel en Roermond.