Waor of neet waor aflevering 478

vrijdag 21 maart 2003

Wim Kuipers

Droebel

[A. FOUT]

Ha, veur kriege siesteem in de vraoge. Gister hauwe veer eine echel, bloodzoeker, en waat kan me daovan kriege, wen zoe'n deer dich efkes begaffelt? Een bultje zólle Hollesje wichter kwake. Bultje, det kan van al zien, mesjiens waal eine droebel. Det is een bultje, mae sjpóntaan gekómme, oet 't blood, neet wen me gesjtaoke is.

[B. FOUT]

Ich mós sebiet aan troebel dinke, Duits trübe. Wen me dan det waord op geit zeuke, jazeker: dan kump me ein inj. Droebel det is get wie módder óngerin eine pool, of ein baek. Wen eine dao-in geit reure, zaet de mam: neet doon, det waert eine grote droebel.

[C. GOED]

Reure in troebel water, doon wichter det? Dan mótte ze leid höbbe. Kan ich mich veursjtèlle, klein wich, de mam gesjtórve, of allewiel: weggeloupe en det zit dao in det water te reure, dao krieg me danig kömpassie mit, mit zoe'ne droebel: bietje zielig wich, kiendj.

[OPLOSSING: C]

Dit waord waert neet väöl mie gebroek, waal 't verkleinwaord: drubelke.