Waor of neet waor aflevering 482

donderdag 27 maart 2003

Paul Prikken

zeikdumpel

[A = FOUT]

Ja, de zeikdumpel dae woort vreuger eine keer in het jaor gebroek. Doe waor d'r nog gein riolering en alles van het huuske det veel rechstreeks in ein koel. Mer wie det is mit koele... die gerake vol, veural es de pap, de mam en zösteen kènjer dezelfde koel gebroeke.

En dan kaom ónvermijdelik de sjoonsten daag van 't jaor, den daag det de baerpöt mit de zeikdumpel laeggemaak moos waere. De zeikdumpel is zoe'ne rónje pot aan eine lange sjtek. In het Nederlands zaet me ouch: ein 'aalschep'.

[B = FOUT]

Dien inspirasie geit de goje kantj oet mer mienen oetlèk is toch ei bitje romantischer. Vreuger laoge op de boerenhaof de mèskoel en de baerpöt midde op den haof. Det waor henjig want dan goofde me van de sjtel neet te wied te loupe mit de zeik en de mès. En op eine sjone zomeraovend dan zoogs te van dei zjwerme zeikumpelkes danse baove de baerpöt. Ei sjoon gezich, al die mökge die in eine zwerm baove dae mèshoup danste. En de boere zatte dan ei benkske en ei teufelke bie de mèshoup, en op det benkske vriejde de boeredochter mit de zoon van de boerehaof wiejerop. Zeikdumpels of zeikdumpelkes zeen dus mökge, en ouch nog ein spisjaal mök, ein mök die het leefs baove de mèshoup vluug.

[C = GOED]

Dao is niks romtantisch aan eine zeikdumpel. Es dien vriejend köppelke op det romantisch benkske bie de mèshoup door eine zeikdumpel gesjtaoke zouw waere dan zouwe ze waal angers piepe. Eine zeikdumpel det is hetzelfde es ein paardenhorzel, de paerdewèsp, in sómmige sjtreke zaet me dao ouch ein praam taenge.

En ich zeen nog gein köppelke vrieje es dao eine zjwerm zeildumpele in de naobers is. De leefde kèn groot zeen, mer zelfmaord is ein anger zaak.

[OPLOSSING = C]

zeikdumpel / paardenhorzel