Waor of neet waor aflevering 483

vrijdag 28 maart 2003

Paul Prikken

köppere

[A = FOUT]

Köppere det deis te mit krote en reube. Veurdet ze geougs waere huijt de boer dao mit ei köppermets de kop mit de blajer vanaaf. Want dao kèns te niks mit doon. Noe geit det köppere machinaal. Köppre beteikent dus: de kop van een kroot of van een reub aafhouwe.

[B = GOED]

Kiek, es ze dich noe de kop zouw aafhouwe, dan zouw het veur dit programma gein versjil make. Dienen oetlèk det is einen oetlèk van ein kip zónger kop. Gans verkierd en oet de loch gegrepe. En es er loesteraers zeen die noe nog twiefele dan raoj ich die aan óm ei sjtök van einen euro oet de beurs te numme en te köppere, kruuts of munt te sjpele. Tösje B en C waal te versjtaon. Want A is toch al verkierd.

Köppere beteikent dus: opgoje, kruuts of munt sjpele. In het Limburgs zeet me ouch kop of kónt.

[C = FOUT]

Moot ich noe blie zeen dets doe eigentlik al toegeufs det dienen oetlèk misjiens verkierd is? Det de loesteraers mer mote gokke tösje dich en mich? Nei loesteraers, laot daen euro mer in de beurs zitte en gebroek eur verstandj. Det brunk CD's op. Es er noe loeteraers zeen die mit tweeje zeen en die de sjnaps kaud höbbe sjtaon, dan zou ich zèkge: sjöd uch ei glaeske in en köpper mer ins op mien gezóndjheid en op het good antwoord C. Köppere is de glaeskes klinke, zutrinken, proost, prosit, zum wohl! Laot het uch sjmake!

[OPLOSSING = B]

köppere /kruis of munt spelen