Waor of neet waor aflevering 484

maandag 31 maart 2003

Paul Prikken

gemaakde menkes

[A = FOUT]

Gemaakde menkes. Kèns menkes make mer kèns ouch wiefkes make. Mer van wiefkes is me meer gewènd det ze gemaak zeen. De oetdrökking: gemaakde wiefkes besjteit dus neet, want wiefkes die soignere zich, die poejere zich, die lètte op de mode, die kieke teen kere in de sjpegel veur ze de sjtraot op gaon. Gemaakde menkes det zag me vreuger van verwiefde mansluuj. Mansluuj die koket wólle zeen, die es eine netten hier in ei net kestuum veur den daaag wólle kómme. Det waor vreuger sjlech gezeen want mansluuj die mooste veural laote zeen det ze kóste wirke en zoepe. Gemaakde menkes beteikent dus: kaal mansluuj, verwiefde mansluuj, mansluuj die euverdreve op hun veurkómme lètte.

[B = FOUT]

Jao, es te hie ederen daag bènnkumps miet eine foelard en ei pochetje in de baoveste kammezaolstesj en bryllkraem in dien haor, dan zouws te inderdaad kónne dènke dets te ei gemaak menke bès. Mer het beteikent get angers. Gemaakde menkes det zeen paeperkoke menkes. Die paeperkoke besjuutjes in de vórm van menkes. Mit de Sinterklaos zeen die zat te kriege. Mer ouch angers, Vunjs ze gewoen in de supermarkt, die gemaakde menkes.

[C = GOED]

Ja loesteraers es geer nao zoe'ne gemaekeliken oetlèk nog veur deskundige A of B gaot sjtömme dan moot geer daonao bie mich neet aankómme mit gemaakde menkes, mit smoesjes, mit oetvlöchte det g'r niks gewónne höb. Kóm uch bie mich dan neet beklage mit gemaakde menkes. Want ich zèk het dudelik: gemaakde menkes zeen oetvlöchte, smoesjes. Höb geer het geheurd?!

[OPLOSSING = C]

gemaakde menkes: uitvluchten, smoesjes, ook gemaakte manieren