Waor of neet waor aflevering 487

donderdag 03 april 2003

Paul Prikken

't kump van de bujel of van de zak

[A = GOED]

Loesteraers die in Oostenriek op vekansie gaon die zulle dees oetdrökking waal kènne. In Kitzbühel wurt veur de toeriste in het sezoen ei volksfies opgevoord. Dan kitse ze dao de bujel, det beteikent det ze zoeväöl geldj mote ophaole det ze het gewich van ei verke höbbe. Dan gaon ze róndj mit bujele en ederein moot dao geldj in goje. En daonao goje ze alles waat ze mit die bujele gecollecteerd höbbe in eine zak en dae waoge ze det mit aan den angere kantj van de waog ei verke es kóntergewich. En es de zak nog neet zjwaor genóg is gaon ze weer róndj mit de bujele, enzoewiejer, pès det ze het gewich höbbe. Daonao wurt det verke gesjlach en waere alle toeriste door de börgemeister oetgeneudig óm gratis mit de doon aan de Kitzbühel-verkesbarbecue. Gratis is natuurlik väöl gezag, want ze höbbe d'r zelf dik veur betaald. 't Kump van de bujel of van de zak. Ouch in Kitzbühel. Het beteikent dus: ein sigaar oet eigen doos, 't liek gratis mer höbs d'r dik veur betaald.

[B = GOED]

De bujel kitse in Kitzbühel! Ich kèn ei plaetske get wiejer es Kitzbühel, Sankt Johann, en dao bujele ze de kits. Det is gans get angers. Eine kier per jaor wurt de kits gebujeld en dan maoge de toeriste keze tösje twie dènger: tösje eine bujel en eine zak. Mer in de bujel en in dae zak zit krek hetzelfde: namentlik twie kilo aerpel. En daovan kump die oetdrökking: 't is krek hetzelfde, het maak neet oet, het is lood om oud ijzer, het is zo lank wie het breid is.

[C = FOUT]

Ich zit hie mit de bujel en de zak in de studio, loesteraers en ich weit ein dènk zeker: es geer veur A of B kees höb geer inderdaad krek hetzelfde, namentlik NIKS. Ratsj verkierd.

En me hoof ouch neet nao Oostenriek te gaon óm die oetdrökking te verklaore. Kèns te de oetdrökking: ein kat in eine zak koupe? Det is het sumpel. Köps get in eine bujel of in eine zak zónger het gezeen et höbbe. Dus kumps ummer bedraoge oet!

 

[OPLOSSING = B]

lood om oud ijzer