Waor of neet waor aflevering 492

donderdag 10 april 2003

Wim Kuipers

Sjemper

[A. GOED]

Sjemper d'r zien d'r nag hóngerde, dink ich. Mae det weite veer modern miense neet mie. Veer weite wie veer ónger 't bridge ein backhand mit 't mobieltje mótte e-mailen, mer aan al die sjempers, dao fitse veer aan veurbie, die zeen veer neet. Waat zien det noe, sjempers? Dieke päöl van Naamse sjtein die aan weerskenj van de pórt van einen haof, ein grote boerderie, sjtaon.

[B. FOUT]

Sjemper, det is ei ziemlieg nuuj waord, zoe waord det d'r op eine late zónjigmiddig inins is. Dink uch ins in, eine sjöt, sjötter veur neet deskundige, dae neet zoe geweldig is, dae sjuut obbernuuj mis, en weer zaet hae: nae, dae woor neet ech mis, ich höb 't bulke geraak, mer 't veel neet. Eine sjampsjeut zoegezag. Det hauw d'r veur de middig ouch al gezag, en de zónjig d'rveur, en inins waerde gezag: dao höbs te dae sjemper weer. Eine man dae nieks fout duit, ummer sjmoesjes verköp ofwaal gemaakde menkes, die veur hie op 31 miert gehad höbbe.

[C. FOUT]

Ja sjmoesjes höbs doe wienig. Mae waal 't verkierde wirkwaord. Sjemper haet nieks mit schampen te make mae mit schimpen, en dan mót 't jederein dudelik zien: eine sjemper is eine dae ummer sjuldj, eine knoterpot of ein graasmoel nag zoe sjiek waord.

[OPLOSSING: A]

Sjemper is ein verkórting van sjamp-paol. Die twie päöl móste veurkómme det de naaf van de kerre de moer oet zólle sjoere. Ze keme ouch veur op d'n hook van ei hoes, wen me dao mit de ker nao achter mós.