Waor of neet waor aflevering 497

donderdag 17 april 2003

Wim Kuipers

Hevvam

(twee v's, geen w)

[A. FOUT]

Hevvam nag ins: hev vam, dao zit höffe in, heffen, en waat höf me zoeal? Zek aerpel, ei kiendj en: beer, glazer. 't Glaas höffe waert gezag, jónges, höbbe veer ammaol get let op det am-maol, dao gaon veer: hevvam. Det is wie zum Wohl, proos.

[B. GOED]

Doe mit dienen drank 't is de Gooj Waek, en dan móch me vreuger nag neet nao ein oethangbord van ein kaffee kieke, laot sjtaon beer ruke, laot sjtaon eine sjloek preuve. Vleis woor verbaoje die waek, vrieje móch de ganse vaste neet, mae kiendjes kriege in de Gooj Waek, det kós de kirk neet verbeje. Die wore lang teväöre besjtèld. En waat deej me dan wen me dach in de Gooj Waek ei wich te kriege? Gans einfach: me góng nao de hevvam: de vroedvrouw of wiesvrouw wie hie meis gezag waerde.

[C. FOUT]

Waat kwatsj. Wen d'r in de vaste get gebaore waerde, dachs doe det die nag neet ein dröpke drónke? Nae nae, zoe hevig woor de vaste neet. Geheurd? Hevig. Dao zit heve in., aod waord veur ges, gist. Höbbe de Pruse nag. Waat duit ges? Rieze, umhoeg gaon, zwellen. Ein zeekde, ein ruzing, meiningsversjil, det kan ammaol rieze, erger waere: dan zaet me: det is hevvam. Ernstiger gewaore, oet de pan gereze.

[OPLOSSING: B]