Waor of neet waor aflevering 501

donderdag 24 april 2003

Wim Kuipers

Zich sjoevere

[A. GOED]

Geweun luuj hauwe vreuger väöl wo ze bang sjoew veur wore. D'n duvel, de waerwouf, witte wiever, mae dao lepe ouch wilj katte róndj van eine maeter lank, ratte wie katte, en wen me die zoog of meinde te zeen, dan sjoeverde de luuj zich duchtig, umdet ze sjoew worde. Dudelik? Sjoevere is riejere, rille.

[B. FOUT]

Wat meins doe noe dameskal, dames die riejere veur ein sjpin? Det zit tösse de oere. Riejere menier det geit van zich sjödde, op en neer, wie wen me sjrikkelike jeuk haet. Vreuger hauw me det dökker me wees zich ins in de veerteen daag, en wen de jeuk neet te haoje woor, dan sjoerde me zich de rök taenge de deursjtiel. Lekkerrrrrrrrrrrr, en det is sjoevere: zich op en neer de rök sjoere taenge eine paol of de deur.

[C. FOUT]

Sjoevere. Me heurt dök, ouch hie op de radio, det emes eine sjuver maak. Det is meis vertaald Hollesj, van schuiver maken, den de echte vörm is sjoever krek wie huiveren hoevere is, huis hoes en kuil koel. Zich sjoevere is dus waat me in Mesjreech sjievele neump: uitglijden.

[OPLOSSING: A]