Waor of neet waor aflevering 502

vrijdag 25 april 2003

Paul Prikken

kopraam

[A = FOUT]

De kopraam. Agrarische sector! Mier bepaold de sector van het agrarisch paerd. Want in paerde höbs te twie kategorieje: het agrarisch paerd det de kar en de ploog truk en het hysterisch paerd. Het hysterisch paerd det zeen die paerde wo maedjes van 15 zoe gek op zeen en det deent allein mer óm op te zitte en te wesje en te roskömme. Het agrarisch paerd dao zaet me in de volksmóndj ouch boerepaerd taenge. En óm ein ploog of ein kar te kónne trèkke haet ein agrarisch paerd eine kopraam óm, einen haam, ein halsjuk, ein gareel. Einen haam veur ei boerepaerd, ei trèkpaerd.

[B = GOED]

Wèts te waat ze bie ós taenge einen agrarischen deskundige zèkge: boerepummel! En óm eine kopraam róndj de nak van ei paerd te kriege moos te al ein hiel groet paerd höbbe mit peut zoe lank wie ein deur hoeg is. Want eine kopraam is einen term oet de boew: het is het vinsterke boeve ein deur, ein bovenlicht wie me det in besjaaf Nederlands zaet.

[C = FOUT]

In det bovenlicht van dich zit ouch neet väöl verstandj. Dao moot den eersten daag nog kómme det dao het leech sjient. Dènk noe is nao - es det meugelik is - en sjpraek het ins lansem oet: kop-raam. Det is get waats te beraamps in de kop. Ei plan, ei veurnumme, ein doelstelling.

Hoofs het neet op te sjrieve, mer veurdets te aan get begins haet eine sjlauwe minsj al eine kopraam: ei plan, ei veurnumme, ei kónsep.

 

[OPLOSSING = B]

kopraam: bovenlicht