Waor of neet waor aflevering 503

maandag 28 april 2003

Paul Prikken

klingelbujel

[A = GOED]

Samegesjtèld waord. Besjteit oet twie deile: klingel en bujel. Dus: eine bujel dae klingelt. Noe zal het de loesteraers opgevalle zeen det er neet väöl bujele zeen die klingele. 't Zouw angers nogal ei laweit zeen es d'r einen tróp seldaote of ein sjötterie veurbiekump. En toch is er in Limburg eine bujel dae klingelt: det is de bujel van de köster es dae mit ziene klingelbujel in de kirk róndjgeit óm de collectere. Det is de klingelbujel: het collectezekske in de kirk. Wie meer geldj dao in zit, wie meer de bujel klink.

[B = FOUT]

In de perverse redeneringe van deskundige A is ummer get loos. Es hae mit het waord neet in den agrarische sector terech kan, dan zèt hae het midde in de kirk.

Moos toch effe get wiejer kieke, bieveurbeeld euver de grens. Waat zaet eine Pruus es de bel geit: es klingelt! Und was klingelt da? Der Beutel! De klingelbujel is geweun ein aud waord veur de klepel van ein bel of ein klok. Want vreuger waor det neet ein iezere sjtaefke wie noe, mer waor det ein iezere of kopere bölke det aan ei tuike in de bel hing.

[C = FOUT]

Der Klingelbeutel!!! Deskundige B haet de bel heure klingele mer hae wèt neet wo de klingelbujel hink!

Ich weit waal wo de klingelbujel hink. En dae hink neet bie de köster en ouch neet in de deurbel, mer in de meule. Óm de zek kaore nao baove te haole en de zek gemale mael weer nao ónger te laote hauw de mölder ein katrol. En aan die katrol zoot ei kóntergewich, de klingelbujel. En daoveur gebroekde de mölder zoeget 50 kilo aud iezer det hae in eine zak deeg, eine bujel aan die touw hóng. Det waor de klingelbujel. En woveur deeg hae dao aud iezer in dae klingelbujel? Es hae baove sjtóng dan heurde hae aan het laweit es dae klingelbujel de gróndj raakde det dae zak mit kaore weer baove waor. Sjpits bedach. Noe heurs te det nog es te in ei geboew de lif paks: bingbong! Mer det is noe elektronisch.

[OPLOSSING = A]

klingelbujel: collectezakje in de kerk