Waor of neet waor aflevering 504

dinsdag 29 april 2003

Paul Prikken

klatersjotel

[A = GOED]

Ich hauw het gistere good, hé, mit miene klingelbujel van de köster, het collectezakje in de kirk! En vandaag höb ich het weer good want de klatersjotel is ein innovatie, ein technische verbaetering van de klingelbujel.

Want waat waor het probleem van de köster mit ziene klingelbujel. In tieje wie noe, es de ekonomie achteroetgeit, goje de luuj dèks knuip in de plaatsj van Euro's in de klingelbujel. In eine bujel kóns te det neet good heure of het eine knoup of einen Euro is. En daoveur haet de köster van Panninge einen tied trök ei patent genómme op de klatersjotel. In de plaatsj van mit de bujel geit hae mit ein iezere sjotel róndj en dan heurt hae direk es eine batteraaf dao eine knoup in geujt. Det is de klatersjotel: de collectesjaal in de kirk, oetvènjing van de köster van Panninge.

[B = FOUT]

Gei wónjer det zoeget oet Panninge kump. Luuj die knuip in de sjaal goje die wone dao, want in Noord-Limburg wone allemaol van die gierige, van die toegeneijde. Mer hie in Zuid-Limburg hove veer de luuj neet te kónterlere op Euro's of knuip. Zuud-Limburgers gaon frisjgewesje mit eine volle portemenee nao de kirk. En wesje det dege ze zich vreuger in de klatersjotel, zoe'n platte kómp die mit de lampetkan op de lavabo in de sjlaopkamer sjtóng. En es me het water van die kan in die kómp sjödde, dan klaterde het. Vandao: klatersjotel, ein platte wesjkómp in de sjlaopkamer.

[C = FOUT]

Me zaet het meistes van vrouluuj mer noe zit ich hie toch mit twie klatersjotele in de studio! Ze höbbe allebei bekans ein hauf oer neudig óm hunne kwatsj te verkoupe en kóns er neet ins tösjekómme! Det is de eigesjap van ein klatersjotel, ein spraakwaterval, ei minsj det mer blief moele en kalle. Ein klatersjotel, zelf in het middelpuntj van de belangstèlling en emes angers niks laote zèkge.

[OPLOSSING = A]

klatersjotel: collecteschaal in de kerk