Waor of neet waor aflevering 506

donderdag 01 mei 2003

Paul Prikken

mit de lamp begrave waere

[A = FOUT]

Ja, de meiste luuj bleve vreuger woene in het dörp woe ze gebaore waore. Ze vriejde bènne het dörp, trouwde bènne het dörp en ze ginge doed in hun dörp. Det waor gein probleem. Es ze den hook óngónge woorte ze ouch in het dörp begrave. Mer noe hauws te van die luuj die het in het dörp neet good genóg vónje. In de plaatsj van braaf bie Veldeke in hun eige dörp et blieve, gónge die euverluipers in ei dörp wiejerop woene es es die dan sjtórve waor det wied weg. En es die ouch nog in det anger dörp begrave woorte, dan woorte ze in het gebaortedörp mit de lamp begrave. Dao woort allein einen aovendwaak gehaute veur die migrante. Det is mit de lamp begrave waere: in dien gebaortedörp wo's te neet meer woens wurt einen aovendwaak gehaute.

[B = FOUT]

Nei, nei. Wurs mit de lamp begrave es doe den ierste bès dae sjturf. Es te begrave wurs es diene man of dien vrouw nog laef. Dan wurst te in ei dobbel graaf gelag en naeve dich is nog plaatsj veur de anger hèlf van dienen trouwbook. Nao den deens en de begrafenis woort dan op die laeg plaatsj ein lamp gezat, óm aan te gaeve det de laevesvlam van dae minsj of die vrouw nog brende.

Det is het: mit de lamp begrave ware. Sjterve en begrave waere es diene partner nog laef.

[C = GOED]

Mit de lamp begrave waere beteikent: gans sjtil, 's mörges vreug begrave waere. Meistes zeen allein de pestoer, de köster, eine messendeender en het paerd van de liekwagel dao. De raej is meistes det emes te erm is óm de begrafenis te beköstige. Mer daobie kump meistes ouch nog ins det den doje in zien femilie zoväöl ruzing hauw det nemes nao zien begrafenis wilt kómme en det zeker nemes van plan is die begrafenis te beköstige.

Det is het: ein einzaam ermenbegrafenis.

 

[OPLOSSING = C]

armenbegrafenis