Waor of neet waor aflevering 507

vrijdag 02 mei 2003

Paul Prikken

ei kirkliek

[A = FOUT]

Het lètste humme haet gein tesje en nemes kèn get mitnumme es hae het graaf in geit. Wurs naaksj gebaore en dan höbs te niks, en es te dood bès, es te kirkliek bès, dan höbs te ouch weer niks.

Det beteikent kirkliek: zoe erm zeen wie einen doje minsj, wie ei liek det in de kirk lik.

[B = FOUT]

Ei kirkliek det zaet me van pilaerbieters, van kwezele, die ummer in de kirk zitte. De kirklieke die zitte altied op de ierste rie, zoedet de pestoer hun good zuut. Jaore en jaore moot de pestoer nao dezelfde fanclub kieke. Es hae oet de sakristie kump óm de mès te doon dan wèt hae het al: de kirklieke zitte d'r weer. Het zeen de kirkpilaere, de pilaerbieters, de luuj die euverdreve väöl in de kirk zitte.

[C = GOED]

Ich hauw het hie toch lèts euver doeje die mit de lamp begrave woorte. Euver de begrafenis van erm luuj wo boete de pestoer en de mèssendeender nemes te zeen is.

En ja: kirkliek is precies het taengeneuvergesjtèlde. Emes dae ierste klas begrave wurt, mit ein plechtige mès, toesjprake, wierouk, ein sjoen eike kis mit kopere knup en al de show en tamtam die bie ein ierste klas begrafenis geheurt. Kirkliek: einen doje dae ein sjieke begrafenis krieg.

[OPLOSSING = C]

kirkliek: dode van aanzien die een eerste-klas-begrafenis kreeg