Waor of neet waor aflevering 509

dinsdag 06 mei 2003

Wim Kuipers

Baejwaeg make

Noot presentator: i.v.m. verschillende uitspraken van baeje s.v.p. meedelen: vertaald is dit: een bidweg maken.

[A. FOUT]

Efkes ei verhaol meug det? Veer sjrieve de nutte wintjer van 1944. Väöl bómbardeminte in Tegele en Venlo. En waat zól nag gebeure wen 't front dunderbie keem? Daoveur belaofde luuj 25 jaor geine vastelaovend te zólle haoje, wen Tegele gesjpaard waerde. Höbbe ze zös jaor vólgehaoje, wie de luuj toch gei geldj hauwe veur zich get in dae melis te sjödde. Anger luuj belaove eine baejwaeg te make, nao Rome of zoe. Baejwaeg make: get plechtig belaove.

[B. FOUT]

Laot ich noe dinke det det zoe bietje 't umgedrejde is. Veer höbbe hie mit ein gans aoj beteikenis van baeje, bidden, te make, namelik vraoge, Duits bete. Kinne veer nag in: om vergeving bidden. Wat is noe eine baejwaeg make? Det is wen me get mót gaon vraoge waat neet zoe maekelik is. Opsjlaag vraoge bie eine nutte baas, es getrouwde miens ein vrouw vraoge die dich al maondje neet duit sjlaope, en die ouch getrouwd is, of d'n oetsjlaag van ei sjlech gemaak exame.

[C. GOED]

Waat maak geer 't uch lestig. Waal ins van pinnetentie geheurd? Zelfde es pienantie: sjtraof. Die sjtraof kreeg me in de beechsjtool. Paar weesgegroetjes, mae vreuger woor det heftiger. Pesjteurs hauwe geldj neudig, en dan sjikde ze es pinnetentie luuj ter bedevaart. Kóste die dao sjlaope, kaerse aansjtaeke. En zoe is de oetdrökking baejwaeg make óntsjtange. 't Is ein kleiner vorm van boete doon, namelik: zien excusus aanbeje. Ich höb dich verkierd behanjeld, ingesjat en zoe wiejer.

[OPLOSSING: C]