Waor of neet waor aflevering 511

donderdag 08 mei 2003

Paul Prikken

euver de benk vlege

[A = GOED]

Ein oetdrökking die de luuj van Jaobaek of Doonder good zulle kènne. In 1982 woort det de gemeinde 'Onderbanken'. Veldeke haet dao in de nuuj sjpelling 'óngerbenk' van gemaak, mer det is neet zjus. De luuj zitte dao neet ónger de benk mer ze vlege dao euver de benk. Ei paar keer per jaor vlege de jóng köppelkes dao euver de benk, es de pestoer in het kirkske einen trouw aafkóndig. Det is euver de benk vlege: es de pestoer dienen trouw aafkóndig.

En in Onderbanken zeen de maedjes nog maagd en höbbe de jónges nog gein sexuele ervaring es ze euver de benk vlege.

[B = FOUT]

Kwatsj. In väöl kirke höbbe ze sjteul en wie kóns te dan euver de benk vlege??? En ich zeen het al veur mich wie die maagde in Jaobeek en Doonder euver de benk vlege. Det moot dao eine sjone show zeen.

Vluugs neet bie de pestoer euver de benk mer bie den deurwaarder. Es te failliet geis, dan verkoupe ze diene ganse santekraom per opbod in ei zaelke. En dan vluug den erme sukgelaer lètterlik mit ziene ganse boedel euver de benk. Alles wurt veur einen habbekrats per opbod verkoch.

Det is euver de benk vlege: failliet gaon en hoes en kraom mote verkoupe.

[C = FOUT]

Ich zoot lèts mit ei paar collega's in de kantien koffie te drènke en wae vloog dao euver de benk? Wèts te neet, hè? Doe, deskundige B. Ich höb dao van alles euver dich geheurd, waat ich nog neet wós. Ich hauw al ei bitje perzónsie d'rvan det dien laeve boete de radio neet fèl katteliek is. Mer waat ich dao allemaol geheurd höb! Jonge, jonge.

Euver de benk vlege beteikent dus det achter diene rök geroddeld wurt, dets te bekald wurs, det achterklap euver dich vertèld wurt.

[OPLOSSING = A]