Waor of neet waor aflevering 512

vrijdag 09 mei 2003

Paul Prikken

daem

[A = GOED]

Es deskundige van den agrarische sector waer ich deks gevraog op sjole óm dao het boerelaeve oet te lèkge. En zoe vroog mich lets ei menke op de leger sjool in Helden wo de milk in de supermarkt vandan kaom. De meister wós het zelf neet en daoveur hauwe ze mich gebraog. Het menke wól det gans precies weite want hae hauw dao versjillige saorte milk zeen sjtaon: vol milk, haufvol milk, mager milk en botermilk. Toen höb ich det oetgelag. Aan den ujer van ein koo zitte veer daeme. Me begint te milke bie den iersten daem bie de linkerachterpoet van de koo. Dao kump de vol milk oet. Es dae laeg is geit me mit de wiezers van de klok mit nao de volgenden daem veur de haufvol milk. Dan kump den darden daem veur de mager milk en oet de lètsten daem löp de botermilk.

De daem det is dus de speen, den tepel aan den ujer van ein koo. Veer daeme: dus veer saorte milk.

[B = FOUT]

Doe meins det het bie ein koo geit wie hie in Café De Tramhalte wo's doe ummer zits. Den tap haet dao veer krane en oet edere kraan kump ein anger saort beer. Mer kóns ouch aan Annie van de Tramhalte vraoge of ze dich einen daem insjöd. Einen daem det is Mestreechs veur 'demi'. En dan tap Annie dich ein hauf glaas blóndj beer en daobie ein hauf glaas broen beer. Det is einen daem, einen demi, ei glaas hauf blóndj en hauf broen doorein. Ei sjiek Mestreechs waord veur waat de sjötte ouch einen haufóm neume.

[C = FOUT]

Ja, loesteraers geer begriep woveur mien collega's ummer in Café den Tramhalte bie Annie zitte. Dao veurt al vieftig jaor geinen tram mier in Mestreech mer toch zitte d'r väöl ederen daag bie Annie op den tram te wachte. Den tram dae noots kump.

En zoe höbbe ze einen daem, ein oetvlöch, óm toch mer neet nao hoes te mote gaon. Einen daem is dus: ein oetvlöch, ei smoesje, ei verzinsel.

[OPLOSSING = A]

daem: uierspeen, speen, tepel