Waor of neet waor aflevering 513

maandag 12 mei 2003

Paul Prikken

'ne piel

(kort uitspreken)

[A = FOUT]

'ne piel, 'ne piel, 'ne piele-piel. Es ich braaf gewaes waor dan kreeg ich van de mam vreuger ummer eine piel. "Hie sjlókmoel", zag ze dan, "hie höbs te eine lekkere piel. Mer waal neet in eine kier opsjlókke". Eine piel is zoe'ne lange zeutsjtaaf, zoe'ne gekleurde sókkersjtaaf. Sjlech veur de tenj, mer lekker!

[B = GOED]

Ich höb hie op de radio eine sjone bureau. En op miene bureau sjtaon twie bekskes: post IN en post OET. Es ich dan weer ei paar daag weg gewaes bèn, dan lik in det postbekske IN eine ganse piel pos: fanmail, felicitasies, oetneudiginge, leefdesbreve van maedjes die op mien sjtöm verleef zeen. Eine piel is dus eine sjtapel, einen houp.

[C = FOUT]

Ja, es te het neet wèts dan moos te es deskundige ouch mer raoje. En dan kóns te piel d'rop zitte mer ouch piel d'rnaeve. Piel beteikent dus krek, precies, zjus. Mer deskundige A en B zitte mit hunnen oetlèk neet piel dernaeve, mer ze kómme neet ins in de buurt. Ratsj d'rnaeve, killemaeters d'ernaeve zou ich zèkge. Mer ich zit mit mienen oetlèk piel op de kaer van de zaak. Haargenau, wie de Pruse zèkge.

[OPLOSSING = B]

piel: stapel, hoop. o.a. te Maastricht. Komt van het Franse 'pile'.