Waor of neet waor aflevering 515

woensdag 14 mei 2003

Wim Kuipers

Uchtere

[A. GOED]

Volgens Bennie Opdenacker, dae is ouch hie van de radio, is det uchele. Uchele, uchtere, de maoderne vorm daovan is het waord loester good: praatprogramma, jederen daag teen kier op d'n tillevies, en de radio. Waat woor det vreuger? Kalle bie d'n haard, buurte, döks ouch op t benkske bie de baek, of ónger de linjeboum.

[B. FOUT]

Waem bön ich det ich bewaer det de Belzje det neet good höbbe. Det kan me allewiel es Hollenjer neet mie zèkge. Mer hie bie ós, en veer zien hie neet in Belsj, dao is uchtere gans get angesj. Dao waert gaaroet neet bie gesjpraoke, den uchtere, det is siësta haoje, een middagdutje doen, meis of bienao ummer ónger 't wirk, dus lekker in het veldj taenge einen boum gaon soeze.

[C. FOUT]

Efkes bie de les blieve. Duitse klankwisseling. Luft is lóch, Kraft kracht, en 't Limburgs hauw 't waord ucht, Duits oft = dikwijls. Det waord is voert, foetsie, mae 't wirkwaord uchtere haet d'n aorlog nag gehaold. Det is: get dök, herhaaldelik doon. De gansen daag hetzelfde leedje zinge, mit de henj op de taofel trómmele, det saort dinger.

[OPLOSSING: A]

Uchtere staat o.m. in het boek Rojer Weurd: uit Stramproy. B. bedoelde unjere.