Waor of neet waor aflevering 519

dinsdag 20 mei 2003

Wim Kuipers

Sjlaagbedraag ( onzijdig, dus ei of n)

[A. FOUT]

Sjlaagbedraag. Geweldig waord, en daomit waert weer beweze wie kórt en kreftig oos taal is, in vergelieking mit 't Nederlandjs. De luuj hauwe bie ós geinen tied zich zoe lank oet te drökke. Ze zagte sjlaagbedraag veur ei bedraag wo ze eine sjlaag nao gesjlage hauwe, dus: roew gesjat. Neet allein geldj mae ouch de opbrings van ei sjtök landj. "Wieväöl petatte levert dich det op? Doot ins ei sjlaagbedraag." Twelfdoezjend kilo.

[B. GOED]

Nae nae det waord kump van betrachten: kieke, in ogenschouw nemen. Let op ogenschouw: ouge, uig, wie me kiek. Zoe is sjlaagbedraag óntsjtange: emes dae 't neet zoe nej nump, alles van de maekelike kantj bekiek, kiep sónger kop. Det hoof neet verkierd te zien.

[C. FOUT]

Det betrachte haet nag ein anger beteikenis, en waal: zekere, borge, wie me ein deur mit eine balk borgde, det die neet aopegeduujd kós waere. Noe det sjlaag: det is geine watsj of helle knal, mae 't opsjlaon van de ker, en det woor lestig wen die vól aerpel zoot. Me mós det veurkómme det det ónverhöts gebeurde, en det deej me mit 't sjlaagbedraag: de houtere pin of blok - womit aan de veurkantj de sjlaagker gezekerd waerde, det die neet op kós kiepe.

[OPLOSSING: B]