Waor of neet waor aflevering 521

donderdag 22 mei 2003

Paul Prikken

takkeling

[A = FOUT]

Ja, 't is ei woord oet de vogelkunde, de ornitologie en mier bepaold ein spisjaliteit in de ornitologie, namenlik de ornitologie van de koekoeksklok. Waat deit ein koekoeksklok? TIK... TAK en aaf en toe KOEKOEK. Noe interesseert ós weitesjappelik gezeen veur dit woord allein den TAK. Neet den tik. Wovan kump den TAK? Dae kump van den takkeling. Dae kump van de grote wiezer van de klok: den takkeling. De kleine wiezer dae deit tik. Det is den tikkeling. Mer det waord verklaor ich in ein volgende opetzending.

[B = GOED]

Noe dach ich toch veur eine kier det deskundige A het mit zienen tikkeling en zienen takkeling het good zouw höbbe. Mer hauverwaeges góng zien fantesie toch weer mit häöm op de luip. 't Haet inderdaad mit veugel te make: mit tikkelinge en takkelinge. Einen tikkeling -g'r heurt het al tik-tik, het is ein klanknabootzing - det is ei veugelke det op het puntj sjteit oet het ei te kómme. Det tikt taenge de eijersjaal. Einen takkeling - geer heurt het 'tak-tak' - det is ei veugelke det op den tak zit en op het puntj sjteit óm oet te vlege. Sumpel hè: tik-tik, tak-tak en neet koe-koek.

[C = FOUT]

Het geit euver veugel, det is zjus, mer de res det klop neet.

Ich höb het hie gistere al gehad euver het feit dets te in Limburg noots eine sjtruusvogel op einen tak zuus zitte. Anger veugel waal. En det kump ómdet de sjtruusvogel einen takkeling is. 't Is waal ei groot bees mer eigentlik is het eine bangbóks, eine bangerik, eine bangesjieter. Me zaet dao ouch takkeling taenge. Groot leweit mer ei klein hertje.

 

[OPLOSSING = B]

takkeling: nestjong dat op het punt staat uit te vliegen