Waor of neet waor aflevering 522

vrijdag 23 mei 2003

Paul Prikken

knienspiep

[A = FOUT]

De knienspiep det waor vreuger op de boerenhaof het opkaemerke veur de boer en de boerin. Die sjlepe in de knienpiep, ei klein kaemerke det mit ei trepke van drie of veer traeje oetkaom op de keuke. Aan den angere kantj van de knienspiep loog de koosjtal. Zoe waor het ummer in de knienspiep lekker werm. De wermde van de keu en de wermde van de keuke. In de knienspiep kreegs te geine rimmetik.

[B = GOED]

Det opkaemerke det geluif ich waal. Mer de knienspiep haet niks mit det sjlaopkaemerke te make, behauve det er in det kaemerke zakes gebäörde wovan ein knienpiep kaom. Ein knienspiep is namentlik de populaer benaming veur ei groet gezin, ei kroostrijk gezin, de pap en de mam mit väöl kinjer. En dan moos te dènke aan 15 kinjer of mier. Det is ein knienspiep.

[C = FOUT]

Noe v'r toch baezig zeen mit de architectuur van de boerenhaof, zal ich mer het zjuste antjwaord gaeve. De knienspiep is ei gaat in de moer, het sjtortgaat det deende óm het sjróbwater nao boete te vaege. In eder kamer zoot ein knienspiep, ei gaat vlak baove de vloer. En es die kamer gepóts woort mit de sjróbber en water en zeip woort het sjróbwater door de knienspiep nao boete gekaerd.

[OPLOSSING = B]