Waor of neet waor aflevering 523

maandag 26 mei 2003

Paul Prikken

menkes make

[A = GOED]

Menkes make det waor het favoriet tiedverdrief van miene nónk Wullem. Dae hauw zèsteen kinjer en ómdet er in daen tied nog geinen tillevisie waor -geer begriep: daoveur hauw hae zèsteen kinjer- moos hae 's aoves zien vrouw en zien kinjer baezig haute. En dan maakde hae menkes. Hae sjpeelde komedie.

Det beteikent menkes make: komedie sjpele, theater sjpele, de gek oethange, complimente make.


[B = FOUT]

Dae Wullem van dich dae zal toch waal neet allein menkes gemaak höbbe. Aaf en toe zal hae toch ouch waal ei wiefke gemaak höbbe. Allemaol veur die knienspiep wo-euver v'r het gistere gehad höbbe.

Nei, nei: menkes make det moos te neet zoe lètterlik opvatte. Menkes make det beteikent hetzelfde es emes zjwart make, emes d'rdoor trèkke.

[C = FOUT]

Menkes make det beeeteikent hetzelfde es ein figuur make, ein figuur sjlaon. Wie de Pruus zaet: eine Figur machen. Dan maaks te menkes. Bieveurbeeld es te eine roje kop kriegs van de sjaemde en den ambarras es te aan de kassa in de supermarkt sjteis en höbs gein geld of gein bankpeske bie dich. Dan maaks te menkes. Lèk het dan mer oet, mer sjleis toch ein figuur want die luuj die achter dich sjtaon die geluive d'r niks van.

[OPLOSSING = A]

menkes make: komedie spelen (Weert, Venlo, Sittard)

gemaakde menkes: uitvluchten