Waor of neet waor aflevering 525

woensdag 28 mei 2003

Wim Kuipers

Dae haet Rome gezeen

[A. FOUT]

Sjieke oetdrökking d'n daag veur Hiemelvaart. Veer dinke sebiet aan Napels zeen en dan hiemele ofwaal sjterve. Noe lik Rome van hiejoet gezeen ei sjtökske veur Napels, en went geer det efkes laot bezinke, dan zal 't dudelik zien waat det beteikent: Rome gezeen: dae is hiel hiel krank gewaes, haet d'n dood gezeen, mae is neet gesjtórve.

[B. GOED]

Wen ich neet zól weite waat det beteikent zól ich ouch zoeget verzinne. Den waat 't is, gluif geine. Me mót zich bedinke: Rome woor vreuger veur kattelieke miense alles, Nuuj York, Peries en Amsterdam biejein. Nao Rome gaon, Rome zeen: dao druimde väöl braaf kattelieke van. Noe de oetdrökking Rome laote zeen, det is ei kiendj aan ziene kop, de henj op de ore, ophöffe, hoog in de lóch: kiek dao achter, dao lik Rome, zuus doe det? En det is neet óngevierlik. In De Avonden van Reve waert besjreve wie zoe wich de nek brik mórsdood.

[C. FOUT]

Ja wens doe 't weer wits, waat mót ich dan. Mae laote veer get dunder bie 't gelouf blieve. Kiek: ouch geweun miense heurde waal ins det die hoog geiselike in Rome onneet 't allerheiligste van 't heilige wore. Zelf breve ze meis braaf, oos Limbeukes, mae 't goof in jeder dörp luuj, manskaerels meis, die neet mie jedere zónjig nao de kirk gónge, die 't mit anger vrouwluuj hole, en die waerde gaaroet neet 't dörp oetgejaag, nae: ouch nette miense hauwe sjtiekem bewónjering veur die daugenete, en euver zoene kaerel waerde gezag: dae haet Rome gezeen, dae wit mier van de werreld dan veer braaf mienskes.

[OPLOSSING: B]