Waor of neet waor aflevering 526

vrijdag 30 mei 2003

Paul Prikken

kevief höbbe

[A = FOUT]

Kóns hie op de radio ouch niks laote likge of het is weg. Es te örges ein pen, einen aansjtaeker of eine blok pepier twee minute neet in de gater hils, dan pakke ze het mit. Allein meulesjtein en heit iezer laote ze likge, mer veur de res zitte ze euveral mit hunne kevief aan, mit hun vief vinger klauwe ze dich alles van diene bureau.

Kevief is ein bargoense benaming veur handj, poot. Eine klauwhannes, einen deef, emes mit lang vingers dae haet kevief.

[B = GOED]

Kiek, es doe kefief zouws höbbe dan zouw het dich neet ummer gebäöre dets te al dien zakes kwiet bès. Mer es te zoe'ne sjlódderjanes bès, zoe óngeregeerd euveral dien zakes leuts sjlingere dan is het gei wónjer dets te alles kwiet geraaks. En dan is het gemaekelik óm emes angers de sjout te gaeve.

Emes mit kevief dae is bie de handj, dae is alert. Dae pas op zien zakes.

[C = FOUT]

Kevief höbbe det is hetzelfde es het Nederlandse 'de aap in de mouw hebben'. Emes mit kefief dae zit vol mit gekkigheid, dae is neet serjeus, dao kóns te neet van op aan.

In de kefee is det waal plezant es te dao luuj mit kefief taengekumps, mer op het wirk is det toch get angers. Ederen daag daezelfde kefief, die flauw grappe, det geit vervaele.

[OPLOSSING = B]

Kevief: van het Frans qui-vive: alert, bijdehand