Waor of neet waor aflevering 527

maandag 02 juni 2003

Paul Prikken

ketsgetuug

[A = GOED]

't Gans geboew hink hie noe vol mit bördjes "Verbaoje te rouke". Nörges kóns te nog ein sigret of ei sigaerke opsjtaeke. En dan moos te van den eelenj boete gaon sjtaon. En dan sjteis et dao in de raenger en wils ei sigretje opsjtaeke en dan gebäört de volgende ramp: höbs gein zjwaegele bie dich, höbs gein ketsgetuug bie dich. Dan moos te mer huipe det eine langs kump dae waal ketsgetuug, zjwaegeel, sjtekskes of einen aansjtaeker haet.

Ketsgetuug is dus sjpöl óm vuur te make. Ein algemein waord veur alles waat vuur maak.

[B = FOUT]

Ich höb nog noots ei paerd zeen rouke, mer ei paerd haet waal ketsgetuug. Het haet veer sjtöks ketsgetuug ónger zien veer peut. Ketsgetuug is het populaer waord veur hoofiezers, hoofbesjlaag. Zuus het ouch es het paerd löp: dan kets het mit zien ketsgetuug op de sjteine waeg.

[C = FOUT]

V'r höbbe hie al zoeväöl wäörd gehad veur 'knikkers': uve, meisje, mervelaers, marbels. Neum ze mer op. Mer es te al die spisjalistische vaktaal neet wils gebroeke dan zaes te: ketsgetuug. Es te vreuger nao sjool góngs waore d'r twie dènger die-s-te neet maogdes vergaete: dien sjooltesj en dien ketsgetuug. Ketsgetuug is dus ein algemein waord veur knikkers, uve, meisje.

 

[OPLOSSING = A]

ketsgetuug: spul om vuur te maken, tondeldoos