Waor of neet waor aflevering 529

woensdag 04 juni 2003

Paul Prikken

aafzètsel

[A = FOUT]

Dao zeen óngetwiefeld loesteraers, die ein aafzètsel in hoes höbbe zónger het te weite. Es te zoe'ne gedeilden trap höbs in hoes, eine trap in twie sjtökke. Dan geis te de ierste hèlf van den trap op in de ein richting en op het aafzètsel dreijst te óm en dan geis te in de anger richting wiejer. Ein aafzètsel is hetzelfde es einen euverluip. Het plat sjtök tösje twie trep.

[B = GOED]

Kiek, aafzètsel is eine raedelik modernen term oet de hasjkwekerie. Woveur verboewe veer hie in Limburg zoe'ne gojen hasj en marihuana. Det kump ómdet hie ginnerasie hobbyboere baezig zeen gewaes óm die Turkse plentjes te veredele. Ze kruutse ze doorein en ze zètte ein aafzètsel van de ein plantj op de anger. En zoe sjtillekesaan kriegs te dan daen hasj woveur Limburg en de Vinkesjlaag waereldberoemd zaen. Kóns het ouch mit buim doon. Aafzètsel is dus eine plantensjtek, ein griffel, ein ent.

[C = FOUT]

Hauve zaol! Dich höbs ouch dien versjtandj in dien klómpe zitte. Teväöl hasj gerouk, zieker, want angers zouws te weite dets te twie aafzètsels ónger dien sjoon höbs zitte. Het aafzètsel is den hak van eine sjoon. Höbs den hauve zaol aan de veurkantj van dien sjoon en dao-achter het aafzètsel: den hak van de sjoon.

 

[OPLOSSING = B]

aafzètsel: plantenstek, griffel, ent